ar

بين البيوت اســـلاح ؟ : ميسون نعيم الرومي

f

طوبه اوصرت ياحيف .. كـِلهـَه تـِرفسَـك

يعراقي شنهي الصار.. التـَمـَّـت تـِفـِرْسَـك

***

سـاحة حـَـرب يـردوك .. نصبوْ مدافع

فـوگ الفگـر والضيم .. للجاره دافـِـع

***

بيـن البيوت اســـلاح ؟ محـّـد يهابـه !
شعب السِـكت مذلول .. مخلوعـَه بابه

***

من حرب الحرب چم دوب ؟ تغسل بالدموم
ياهـو اليجي يوليـك .. يا شــــعب الهموم

***

لعيونه كلشي ايهون .. جار المصايب

واليرضه باللسـعات كل وكتـَه خايـب

***

فـَرْغو وطنه افلوس .. هم خيره منهوب

للجاره كلهه اتروح .. والحرب عالبوب

***

(يالملحه) ربّي اولاد .. زتي للحروب

حصتچ عـَـلـَم ملفوف .. وانتي بالدروب

***

حكام اجونه اجناب .. امن الجاره صوغه

صار العراق اتراب .. وابگلبه شـــوغـَه

***

چـَـنـَّـك تظل منذور .. للحرب دومك

يالشعب نايم ليـش .. طولت نـومـك

***

مولح صبيهه العين .. من صب الدموع
من الزغر لليوم .. بـس نـبچي وانـلوع

————————————-

21 / آب / 2019

ســـــــــــــتوكهولم

الموضوع يعبر عن رأي الكاتب وبالضرورة لا يعبر عن راي بحزاني نت


اضف رد

لن يتم نشر البريد الإلكتروني . الحقول المطلوبة مشار لها بـ *

*