جبناها عل انتخابات .... والعاقل يفتهم...؟؟؟
هادي دوباني
هسه خلي احجيلكم سالفة من سوالف السلف يعني من القصص الي كان اجدادنا واجدادكم يحجوها بالتعليلة من جان لا كهرباء ولا انترنيت ولا صور سلفي وبث مباشر وتويتر وسناب جات ومن هل سوالف ....؟؟؟
يكولون جان أكو بقرية راعي يرعى بالابقار مالت القرية بالاجرة الشهرية وطبعا هذا كان بيه طبع ما يزعل ابدا أي بقرة تسوي الي تسويه براحتها تفوت على أي زرع بستان ما ترعى تتعارك أي شيء تسوي ولا يحجي او يضرب أي بقرة ، حتى الابقار من البطر كانت مدللة وبراحتها لان لا ضرب ولا يزعلهن ابد.
يكولون راحت الايام واجت الايام والسنين والبقر على هاي الحالة وفد يوم من الايام الراعي الطيب بالنسبة للبقر انطاكم عمره واتوفى .... فاجتمعوا أهل القرية وجابو راعي ثاني راح يرعى بالابقار يوم يومين وما اتحمل وبطل لان البقر بطران وما تعود على الصياح والضرب ، وراحوا دوروا على راعي ثاني وهم ما اتحمل وراعي ثالث وهم بطل طلعت روحهم اهل القرية وماكو راعي يتحمل ، وبالاخير اجا واحد وكال اني اصير راعي بس بشرط وبدون تفكير وافقوا اهل القرية.
بس عمي كول شنو شرط.
كال من باجر كل واحد ياخذ بقرته ويروح للولاية ويبيعها ويشتري بقرة ثانية فوافقوا وجابو بقر جديد ورتاحوا وارتاحت القرية من البقر البطران؟؟ وصار انتاج جديد بكل شيء
هسه بروح ابوكم شلون يعني نجيب راعي جديد لو نغير البقر ؟؟؟؟
ادري هسه راح تكولون سياسة وفي السياسة كل شيء وارد لانه لا يوجد عدو دائم او صديق دائم ولكن توجد مصالح دائمة بروح بيبيتي اعرف هذا الشيء كلش زين بس مال يتحالف الليبرالي مع الاسلامي المتشدد ويتحالف الي كان من البارحة بس يتهم الاخر بالخيانة ويجي يخلي ايده بيده هاي ما افتهمها ، زين احنا اشبينا رايحين نركض وننتخب وكل مرة نعيد نفس الكره وبعدين نجي نبجي ونكول فساد وحرامية ومرتشين اييييي منو جابهم غيرنا احنا مو احنا انتخبانهم ؟؟؟
وبعدين خلي يجي واحد واحد بس اخو خيته ويكولي من 2005 وهو ينتخب نفس الوجوه شنو الي اتغيير غير عدد الحرامية والسارق وازدياد في الجوع والفقر والنزوح والدمار وزيادة في ارصدة الانتهازيين والحرامية في البنوك الخارجية .
ها قبل ما انسى بالنسبة لجماعتنا الايزيدية في الانتخابات الماضية هم ما قصروا خلف الله عليهم تقريبا 60 واحد رشح ويا كل الاحزاب العراقية والكوردستانية وحتى من ضمن القائمة الواحدة ومحد انطا مجال للثاني وبالاخير فشلو كلهم واكو بيهم ناس حصل صوت او صوتين .
بس لا في بالكم تعيدون نفس الكره مرة ثانية عمي كافي فضحتونا بخودىء لو شعاركم مثل منتخب العراق بالبطولات اهم المشاركة مو مهم النتائج. وبعدين عمي انتو المخضرمين الي صارلكم سنين وسنين بالسلطات الادارية والبرلمانية والثقافية الايزيدية عمي كافي لخاطر خودىء انطو مجال لغيركم . ترى اذا راح تضوجونا راح نجيب بقر جديد وفلة.

عذرا على التشبيه الغاية ايصال الفكرة ( طلعت روحنا مو كافي)