– بداية معرفتي بالشاي الاخضر كان من استاذي في المدرسه من سنين , كان وزنه مرتفع جدا و في خلال شهور قليله وجدت وزنه بقي مثالي , فسألته عن السر في انه تخلص من الوزن الزائد , فقالي ( كل الي بعمله اني قللت اكل و كنت بشرب شاي اخضر ثلاثه مرات يوميا ) , من هنا بدأت اسئل و ابحث عن الشاي الاخضر و اعرف عباره عن ايه و شكله عامل ازاي , روحت لعطاره و سألته عن الشاي الاخضر و اشتريت منه علبه لسا متذكر اسمها ( شاي اخضر المعبد ).
العلبه شكلها كبير و بتقعد وقت كتير بس كانت مشكلتي معاها انه بتضطر انك تصفي الشاي بالمصفاه مع كل مره بتعمل كوب شاي اخضر علشان ورق الشاي الاخضر و طعمه كان بيبقي تقيل و مركز جدااااا بس شاي ممتاز و سعره منخفض .
فضلت بشرب الشاي فتره مش كبيره حوالي اسبوعين و بعد كده زهقت منه و ده بسبب اني مش متعود عليه , بس الي لاحظته في الفتره الي كنت بشرب فيها الشاي الاخضر : اولا معدتي كانت مستريحه جدا جدا و كنت بحس ان انا فريش و خفيف كده و لاحظت ان بطني انكمشت شويه و سبحان الله في بعض الاوقات كنت بحس كانها مشفوطه للداخل لوحدها .
بعد كده بقي اتعرفت علي الشاي الاخضر ليبتون الفتله من السوبر ماركت و بصراحه كان مريح ليا اكثر مجرد اني بضع الفتله في المج و بصب عليها المياه المغليه و بشرب بدون ما اصفي او حاجه و طعمه كان بيبقي جميل جدا مش مركز طبعا زي شاي المعبد بس ليه تأثير ممتاز .

تجربتي مع الشاي الاخضر للتخسيس