سنه سعيدة للجميع
والى وطننا السلام وتجاوز الغمة
اسـمع يا عالم يا ناس – قصتنه قصه اتشب الراس
موت اويحصد بالشبان – ذاك الحمام اوذاك الطاس
راحـَـت ولدچ يا (ذيقار) – ويـن الشـاره (يالعباس)-
ننحب نبچي كلنه ادموع – گاعچ (بغداد) الما تنداس
اشلون المفتاح اتسلمين؟ – بيدين الزمره الأنجاس
والنجف الصارت (ألطف) – اعمايم تضرب بالراس؟
اورود انمردت دمهم ساح – والعالم صامت ماكو احاس
اهوايـه الموتـَه بالميـات – ادموم السالت ما تنقاس
تـَرْفه ولدنه اشلون اتموت؟ – مـُـرّ اجرَعـْـنـَه ابنفس الكاس
اورود اوحلويـن الشـبان – ليلو مرجان او الماس
للموت انزفهم ؟ وين الدين – ردنه انزفهم للأعراس
احلام انطشت بالگاع – حيف او وسفه ع الأغراس
المن نشكي ؟ ضاع الصوت – عـَـفـْنـَه الدوله حد الساس
يا وطني..يا وطني المنهوب – ولدك ذوله فخرالناس
من حرب الحرب اونفتر- اندافع هاليوم او (للقناص)-
بـَـرَّه بـَـرّه يا اذناب – واذناب الأذناب الأنجاس
أحزاب اونواب..كتل اوسلطات – نبدي انحاكم من الراس
فليحيا الثوار الأبطال – بيكم والله يعله الراس
بيكم والله يعله الراس
——————————————————-
30 / ديسمبر/2019
ســــــــــــــــتوكهولم
|
|
